مانگردن کاسبکارەیل شار بانە لە بیست و دوێمین روژ درێژە دێرێ

29

مانگردن و ناڕەزایەتی دوکاندار و کاسبکارەیل شار بانە دژ وە داخریان دەروازە و بازارچەیل مەرزی روژهەڵات کوردستان و فرەتر کریان نرخ گومروک لە لایەن رژیم ئێران, ئیمڕوژ لە ٢٢مین روژ بەردەوامە.
لە لایترەک جوانەیل شار بانە لە گشت خەڵک روژهەڵات کوردستان داوا کردنە بانە تەنیا نەیلن و وە هەرشیوەیگ بوود پشتیوانی بکەن.

لە ئدامەی ناڕەزایەتی و مانگردن دوکاندار و کاسبکارەیل شارەیل روژهەڵات کوردستان، لە شار بانە ئیمڕوژ و لە ٢٢مین روژ، خەڵک وە تاتیل کردن بازار و بەسان دوکانەیلیان، ناڕەزایەتیەکان خوەیان ئدامە دانە.

ئیە لە وەختێگەس ک رژیم ئێران، هێزەیل فرەیگ ئەمنیەتی هاوردیەسە ناو خیاوانەیل شار بانە و وەشیوەیگ حکومەت نزامی وەڕێوە بەید.

هەروەیجوورە دوکاندار و کاسبکارەیل شار بانە ئەڕا رەسین وە داخوازەکانیان، لە ناو روژەیل وەرین ئەڕا چەنمین جار لە وەردەم ساختمان فەرمانداری رژیم ئێران گردبینەوەی ناڕەزایی ئەنجام دان و تەنانەت لە ناو خیاوانەگان چادر ناڕەزایی هەڵدانە.

لە لایترەک لە ٢٠مین روژ مانگردن خەڵک بانە گروپێگ لە جوانەیل ئەو شارە وە بڵاو کردن بەیانیەیگ داوا لە خەڵک شارەگان ترەگ روژهەڵات کوردستان کردن، ئەڕا سەرکەفتن داواکاری خەڵک بانە، پشتیوانی لە پاوەگەزدان خەڵک بانە بکەن.

جیا لە ئیە لە ئی ٢٢ روژە خەڵک و دانشجوەیل شارسان بانە وە شیوازەیل جوراوجوور پشتیوانی خوەیان لە ئی مانگردنە ئیلانن کردنە

جێ وەتنە کاسبکار و دوکاندارتەیل شارەیل بانە، سەقز، جوانڕو، مەهاباد، پیرانشار، مەریوان و ژمارێ ترەک شار لە روژ ٢٦ خاکەلێوە یەک لە شوون یەک دژ وە داخریان دەروازە و بازارچەیل مەرزی روژهەڵات کوردستان و فرەتر کریان نرخ گومروک لە لایەن رژیم ئێران نارەزایەتیان دەسوەپێ کردن و ئیمروژ لە ٢٢مین روژ مانگردن شار بانە بەردەوامە.

Leave A Reply

Your email address will not be published.