لە شوون ٩ ساڵ هەڵوژاردن پارلمان لە وڵات لوبنان وەڕێوە چوود

20

ئیمڕوژ شەوەکی لە شوون ٩ ساڵ خەڵك لە وڵات لوبنان ئەڕا هەڵوژاردن نمایەندەیل خوەین چینەسە پای سەندوق دەنگدان.

هەڵوژاردن پارلمان لوبنان ئیمڕوژ لە سەر ئەساس قانون تازەی هەڵوژاردن دەسوەپێ کردیە و هەتا ساعەت ٧ ئێوارە وە وەخت لوبنان هەڵوژاردنەگە درێژە دێرێ، قەرارە سوو ئەنجام هەڵوژاردنەگان ئەڕا رای گشتی ئیلان بکریەد.

لە ئی سیستمە، لوبنان بیەسە ١٥ حەوزەی هەڵوژاردن و هەر حەوزە لە بەین ٥ تا ١٣ کورسی دێرێ.

ئاماج قانون تازەی ئی هەڵوژاردنە ئەوەسە ک شانس کەسەیل سەروەخو ئەڕا چین وە پارلمان فرەتر بوود.

لە لوبنان ٣ملیون و ٧٠٠ هەزار کەس توانن دەنگ بیەن و ١٢٨ نمایەندە هەڵوژنن.

لە ١٢٨ کورسی پارلمان ٦٤ کورسی ئەڕ موسەڵمانەیلە و ٦٤ ترەک ئەڕا مەسیحیەیلە.

جێ وەتنە ئەڕا یەکم جار یەک کورد لە وڵات لوبنان خوەی کاندید کردیە ک بتوانێ جوور کوردێگ بچوودە پارلمان لوبنان.

ئاخەرین هەڵوژاردن پارلمان لوبنان لە ساڵ ٢٠٠٩ وەڕێوە چی و وە خاتر موشکلەیل ئەمنیەتی وەڕێوە چین هەڵوژاردن پارلمان هەتا ئیسە کەفتیەسە دویا.

Leave A Reply

Your email address will not be published.