کارەیلان: پێکهاوردن یەکیەتی نەتەوەیی وەسیەت قەرەسونگور و وەزیفەی سەر شان ئیمەس

37

فەرماندەی قەرارگای ناوەندی ناوەند پارێزین گەل نەپەگە موراد کارەیلان لە مەراسمیگ نزامی رێز لە یاد و تێکوشان شەهیدەیل یەکیەتی نەتەوەیی محەمەد قەرەسونگور و ئبراهیم بیلگین گرد.
موراد کارەیلان وەت: لەی وەختە گەلەگەمان فرەتر لە گشت چشتیک وە یەکیەتی نەتەوەیی لازم دیرێ و هەر وەزیفەیگ بکەفیدە سەر شان ئیمە وە دڵ و گیان ئەنجامێ دەیم.

فەرماندەی قەرارگای ناوەندی ناوەند پارێزین گەل نەپەگە موراد کارەیلان لە مەراسم نزامی ساڵڕوژ شەهید بین محەمەد قەرەسونگور و ئبراهیم بیلگین کە لە هەرێمەگان پارێزین مەدیا پێکهاتوی بەشداری کرد و ئشارە کردە ئەهەمیەت یەکیەتی نەتەوەیی ئەڕا گەل کورد.

موراد کارەیلان، ئشارە کردە تەقەلاگان جمشت ئازادی گەل کورد وە پێشەنگایەتی پەکەکە ئەڕا پێکهاوردن یەکیەتی نەتەوەیی گەل کورد و ئیلان کرد: ٣٦ ساڵ وەرجە ئیسە فەرماندە محەمەد قەرەسونگور و هەڤال ئبراهیم بیلگین لە وەخت تەقەلاگانیان ئەڕا ئاشتی لە بەین لایەنەیل کوردی و پێکهاوردن یەکیەتی نەتەوەیی، لە شەڕ بەین یەکیەتی نیشتمانی و حزب شیوعی گیانیان بەخت کردن.

کارەیلان لە قسەگانی ئشارە کردە سەر کەسایەتی و تێکوشان فەرماندە محەمەد قەرەسونگور و ئبراهیم بیلگین و وەتیە: هەڤال محەمەد قەرەسونگور یەکمین فەرماندەی نزامی هێزەیل گەریلا بیە، کە فەرماندەیی ئەمەلیات حیلوان و سیڤەرەک لە رەوشیگ سەخت لە سەر شانی بی و ئەمەلیاتەگە وە پیروزی رەسان، هەڤال ئبراهیم بیلگین وەڵاتپارێزیگ جوان ئاپۆیی بی، کە وە شیوەیگ فەدایی ئەڕا گشت جورە چالاکیک ئامادە بی.

موراد کارەیلان لە ئدامەی قسەگانی رێز لە یاد محەمەد قەرەسونگور و ئبراهیم بیلگین جور شەهیدەیل یەکیەتی نەتەوەیی گرد و ئیلان کرد: ئیمە ئیمڕوژ جور گەریلایەیل ئازادی کوردستان قەوڵ دەیم کە تێکوشانیان وە دێ باریم، هەڤالەیلمان ئەڕا پێکهاوردن یەکیەتی نەتەوەیی گیانیان بەختکردن، ٣٥ ساڵ وەرجە ئیسە لە بەین لایەنەیل کوردی شەڕ و ناکوکی فرە بی، هەڤاڵ محەمەد قەرەسونگور و ئبراهیم بیلگین لەو وەختە ئەڕا کوتایی هاوردن شەڕ و پێکهاوردن یەکیەتی نەتەوەیی تێکوشان کردن و ئیمڕوژ رێ و رێبازیان ئدامە دیم.

فەرماندەی قەرارگای ناوەندی ناوەند پارێزین گەل موراد کارەیلان لە ئاخر قسەگانی ئیلان کرد: بنەوانایەن یەکیەتی نەتەوەیی وەسیەت هەڤال محەمەد قەرەسونگور و وەزیفەی سەر شان ئیمەس، لەی وەختە گەلەگەمان فرەتر لە گشت چشتیک وە یەکیەتی نەتەوەیی لازم دیرن و هەر وەزیفەیگ بکەفیدە سەر شان ئیمە وە دڵ و گیان ئەنجامی دەیم.

Leave A Reply

Your email address will not be published.