سی و شەش ناوەند حقوق بەشەری داوا کردن سزای ڕامین حوسەین‌پەناهی لاوریەد

9

دژایەتیەکان کۆمار سێدارە وەگەرد گەل کورد بەردەوامە و ئەگەر جێوەجێ کریان سزای دژە ئنسانی ئێدام زندانی سیاسی کورد ڕامین حوسەین‌پەناهی هالە ئارا.
کۆمار سێدارە سەربار ئەوەیکە ڕامین حوسەین‌پەناهی لە ژێر شکەنجە قەرار دایە و سزاێ دژە ئنسانی ئێدام داسپانێەسە سەرێ، هاووەخت دویەکە وە شێوەیک وەحشیانە هێرش کردە سەر خانەوادەکەی لە شار سنە.

لە لایترەک فرەتر لە ٣٦ ناوەند حقوق بەشەری داوای لاوریان سزای ئێدام ڕامین حوسەین پەناهی بینە.

چالاک سیاسی کورد ڕامین حوسەین‌پەناهی ڕوژ ٢ پویشپەر پارەکەی هەتاوی لە شوون شەڕ و دەرگیری هێزەیل سپای پاسدارەیل رژیم ئێران وەگەرد ژمارێک لە پێشمەرگەیل کومەڵە لە شار سنەی ڕوژهەڵات کوردستان دەسگیر کریا.

ڕامین لە شوون ٢٠٠ ڕوژ لە گیردانێ لە ئوتاقەیل تەنیایی ئەڕا زندان ناوەندی سنە ئنتقاڵ دریا. ڕامین لە ڕوژ ٢٥ بەفرنبار ٩٦ لە دادگای رژیم ئێران سزای دژە ئنسانی ئێدام وەسەریا داسپیا و روژ ٢٢ خاکەلێوەی ئیمساڵ ٩٧ سزای ئێدامەکەی لە دیوان بەرز ئیران لە شار قوم پەسەن کریا.

ئەو سزا لە حاڵێکاس کە ڕامین حوسەین‌پەناهی سزای ئەقدام دژ وە ئەمنیەت نەتەوەییک کە دریاسە پاڵێ ڕەد کردیە و وەکیلەکەی ئەو سزا وە ناعەداڵەتانە ناو بردیە.

چالاکەیل سیاسی و مەدەنی و ناوەندەیل حقوق بەشەری سزای وە هەڵوێست و چالاکییەیل جیاجیا داسپیان و پەسەن کریان ئەو سزا وە ناعەداڵەتانە ناو بردیە.

دەسگیری داڵگ و باوگ ڕامین!!!
دویەکە یەکشەمە خانەوادەی حوسەین‌پەناهی وە مەبەست داخواز شکیان و شەرمەزار کردن ئێدام ڕامین لە مەیدان ئقباڵ شار سنە گردبینەوەی ناڕەزایی ئاشتیانە ڕیکخستنە، کە هێزەیل رژیم ئێران وەشێوەی وەحشیانە هێرش کردنەسە سەریان و داڵگ و باوک کەفتە کار ڕامین دەسگیر و ئەڕا ناوەندەیل ئەمنیەتی ئنتقاڵیان دانە و ئەڕا ماوەی چەن ساعەت لە ژێر فشار و بازجوویی بینە.

٣٦ ناوەند حقوق بەشەری لە گشت ناوەندەیل حقوق بەشەری و ناونەتەوەیی داوا کردنە ئەڕا لاوردن سزای ئێدام ڕامین حوسەین پەناهی هەنگاو جدی هێز بیەن.

ئەو ٣٦ ناوەند حقوق بەشەریە لە بەیانیەکەیان ئشارە کردنە، رژیم ئێران لە زەمان وەسەر کار هاتنێ تا ئێسە وە پشت بەستن وە خشونەت، سەرکوت، دەسگیری و ئێدام تەقالا کردیە دەنگ گەلان غەیر فارس لە ئێران خەفە بکەی و گشت مافەکانیان پایماڵ کردێە.

ئەو ٣٦ ناوەندە سەربار شەرمەزار کردن، داوا کردنە تا سزای ئێدام سەر زندانی سیاسی کورد ڕامین حوسەین‌پەناهی لابوریەد.
جێ وەتنە، کۆمار سێدارە لە باوەت جێوەجێ کردن سزای دژە ئسانی ئێدام لە ساڵ ٢٠١٧ لە پلەی ٢م جەهان قەرار گردێە.
سازمان بەخشین ناونەتەوەیی لە ڕاپورت ساڵانەی خوەی ئاشکار کردێە جمهوری ئسلامی ئێران لە ناو ساڵ ٢٠١٧ دەسکەم ٥٠٧ کەس لە سێدارە داس.

Leave A Reply

Your email address will not be published.