ئەنجامنامەی سێمین کۆنفرانس کوردەیل فەیلی ئەڕا ڕای گشتی ئاشکار کریا

11

ڕوژ ١٢ ئاپریل ئیمساڵ زاینی لە مەقەڕ شەورای ئروپا لە شار بروکسل پایتەخت وڵات بلژیک ٣مین کۆنفرانس کوردەیل وەڕێوە چی. ئێسە و لە شوون چەن ڕوژ لە کۆتایی هاتن ئەو کۆنفرانسە ئەنجامنامەکەی لە چەن داخواز و ڕێ چارە ئەڕا چارەسەری موشکڵەکان، ئەڕا ڕای گشتی ئاشکار کریاس.

یەکی لە خاڵ و داواکاری کوردەیل فەیلی ئاشتی و ئارامی، سەقامگیری و وەیەکوەژیان گەلانە.

لە ٣مین کۆنفرانس کوردەیل فەیلی لە شار بروکسل پایتەخت وڵات بلژیک، دەسخوەشی و قەیرزانی لە کۆنگرەیی نەتەوەیی کوردستان، کەنەکە کریاس ئەڕا هاوکاری کردن لە ڕێکخریان ئەو کۆنگرە.

لە ئەنجامنامەی ئەو کۆنفرانس ئشارە کریاس کە ٣مین کۆنگرەی کوردەیل فەیلی لە حاڵێکا ئەنجام گرێ کە کوردستان، عەراق و ڕوژهەڵات ناوەڕاس لە ڕەوشێک ئاڵوز قەرار گردێە، لە دومین کۆنفرانس تا ئێسە کە ٣مین کۆنفرانس وەڕێوە چوود ئاڵوگوڕەیل فرەیک لە ناوچەکە وەگشتی ڕوی دایەس.

لەو ئەنجامنامە ئشارە کریاس هەرچەن ئەو گوڕانکارییەیلە بەشێکێ موسبەت بینە، بەڵام ڕەوش ئاسایش و ئارامی لە کاملی سەرقامگیر نەویە، خەتەرەکان لە سەر کەمینەکان لە ناوێان کوردەیل فەیلی لە شار و ناوچەیل باشوور کوردستان و عەراق فرە سەختە.

– لە ئەنجامنامەی ئەو کۆنگرە ئشارە کریاس، ئەوان جوور کوردەیل فەیلی لە وەرانوەر ئەو خەتەرەیلە چەندین داخوازی دیریم، لەوانە:

* گشت داخوازەیل کوردەیل فەیلی لە ٢مین و ٣مین کۆنگرەی جێوەجێ بکریەد.
* لە سەر پروسەی دموکراتیک، ئاڵوگوڕ لە باوەت کۆمەڵایەتی، ئقتسادی، سیاسی و قانونی، ئاوا کردن کۆمەڵگایک یەکسان و پیادە کردن کولتور وەیەکوە ژیان سیاسی و کۆمەڵایەتی و لە وەر چەو گردن حەق و حقوق کەمینەکان کار بکریەد.

* ئیمە تاکید کەیم کە ژن موهمتەرین ئەندام کۆمەڵگاس لە باوەت فەرهەنگی و سیاسی، ئقتسادی و کۆمەڵایەتی.
* بایەد کار ئەڕا جوان و مناڵەیل بکریەد تا بتوانن ڕوانین بانان خوەیان دویر لە توندوتێژی و خشونەت تامین بکەن.

– لە ئەنجامنامەکەی ٣مین کۆنفرانس کوردەیل فەیلی داوا لە یەکیەتی ئروپا کریاس تا ئەڕا پیادە کردن ئامانج و داخوازەیل خاڵەیل خوار لە باوەت مادی و مەعنەوی هاوکاری جدی بکەی:

* ڕێ وە کۆمەڵگای کوردەیل فەیلی لە گشت شار و ناوچەکان عەراق و باشوور کوردستان بێریەد، خوەیان ڕێکخستن بکەن، ئجازە بێریەد لە چوارچوەی سیستم لامەرکەزیەت خوەیوەڕێوەبەری خوەیان دروس بکەن و کار ئەڕا ڕێکخستن هێز خوەی پارێزین خوەیان بکەن.

* سەقامگیری ئاشتی وەشێوەیک بتوانێ ڕێ خوەشکەر بوود ئەڕا زنەییک ئاشتیانە و وەیەکوە ژیان گەلان، تا بتوانێ لە چواربەش کوردستان کومەک وە ئارامی و سەقامگیری بکەی.
* داوا لە حکومەتی فدراڵ و هەرێم کوردستان بکریەد کار جدی ئەڕا سەر لەنو سازین ناوچەکان بکەی و بودجەی تایبەت ئەڕا ئەو مەسەڵە دابین بکەی.
* ئەهمیەت وە ژێرخان ناوچەیل کورد فەیلی‌نشین بێریەد و کار ئەڕا ئاوا کردنیان لە باوەت ئاموزش و پەروەرش، تەندرستی و گشت بوارەکان خزمەتگوزاری بکریەد.

* و فرسەت دەورەیل ئاموزشی لە باوەت وە کارمەند و پولیس مەحەلی بیین وە کوردەیل فەیلی بێریەد تا جوانەیل بتوانن لە باوەت بانان خوەیان و ناوچەکانیان ڕوڵ موسبەت داشتون.

Leave A Reply

Your email address will not be published.