کەجەکە: باشوور کوردستان هالە خەتەرێک و لەی ڕەوشە یەکیەتی نەتەوەیی کورد فرە زەرورە

23

هاوسەرۆکایەتی شەورای ڕابەری کۆنفدرالیزم کۆمەڵگایەیل کوردستان، کەجەکە لە باوەت رەوش ئاڵوز کوردستان، هێرش و داگیرکاریەکان تورکیە بەیانیەیک بڵاو کردیەسەو. کەجەکە لە بەیانیەکەی سەربار ئشارە وە ئەوەیکە باشوور کوردستان ڕوی وە ڕوی خەتەر فرە گەورایک بیە، تاکید کردیە، وەخاتر شکانن هێرش و پلان وڵاتەیل داگیرکەر، یەکیەتی نەتەوەیی کورد وە زویتەرین وەخت ڕێکبخریەد.

هاوسەرۆکایەتی شەورای ڕابەری کەجەکە لە ئەوەڵ بەیانیەکەی ئشارە کردیەسە زیای بین هێرش و داگیرکاریەکان تورکیە و دروس کریان پایگایەیل نزامی لە باشوور کوردستان و ئەوە وە خەتەرێک ئەڕا سەر گشت بەشەکان کوردستان و روژهەڵات ناوەڕاس ناو بردیە.

کەجەکە ئشارە کردیە دوشمنایەتی ئاکەپە و مەهەپە وەگەرد کوردەیل ئەڕا لە ناو بردن زنەیی ئازاد و دموکراسی و ئشارە کردیە تورکیە هەر لەو چوار چوە عەفرینیش داگیر کرد.

کەجەکە لە بەیانیەکەی ئشارە کردیە، دەسڵاتداری ئاکەپە هەم لە ناو و دەیشت وڵات تەقالا کرد جمشت ئازادی لە ناو بوەی، بەڵام نەتوانست، هەر وە ئەو خاترە بی لە ساڵ ٢٠١٥ هێرش و دوشمنایەتیەکان خوەی زیای کرد و کارێک کردیە کە ڕوژهەڵات ناوەڕاس تویش شەڕیک لە ئاست شەڕ جەهانی سێم بکەی.

ئاکەپە توای کارێک بکەی کە کوردەیل بێ جایگا و شوون و لوون بکەی و ئجازە نەیەی دەسکەفت تازە وە دەس بارن، ئاکەپە ئەگەر وەپێ بکریەد ئەو فدرالییەیکە لە باشوور کوردستانیش هەس لە ناوێ بەی.

تورکیە لە باشوور کوردستان زیاتر لە ١٥ پایگای نزامی دێری، ئەو پایگایەیلە نە تەنیا دژ وە خەبات و پاوەگەزدان جمشت ئازادی دروس کریانە، بەڵکو وە ئامانج کۆنتروڵ کردن گشت باشوور کوردستان و نواگیری کردن لە پێکهاتن یەکیەتی نەتەوەیی کوردە.

کەجەکە لە بەیانیەکەی ئشارە کردیەسە هێرشەکان تورکیە ئەڕا سەر هەرێمەکان پاراستن مەدیا و ناوچەی برادوست لە هەرێم کوردستان و ئشارە کردیە، ئەی هێرشەیلە وەگەرد هێرشەیل جاران فەرقێ فرەس، ئاکەپە و مەهەپە دژ وە کوردەیل دەس کردنەسە هێرش سەرتاسەری و گشت لایەنە.

کەجەکە ئزافە کردیە، ئەوەیکە وەتن کەرکوک شارێکە تورکمانی، خوەی نیشانەی ئاژاوەگەڕی و دوشمنایەتی ئاکەپە و مەهەپەس وەگەرد گەل کوردە.

لە بەیانیەکەی کەجەکە ڕوشنایی خریاسە سەر چالاکی و ناڕەزایی خەڵک باشوور کوردستان دژ وە هێرش و داگیرکاریەکان تورکیە و تاکید کردیە، بایەد گەل کورد و هێزەیل سیاسی دژ وە ئەو هێرش و داگیرکارییەیل تورکیە بوسن، چوینکە لە هێرشەکان تورکیە خەڵکەیل مەدەنی کریەنە قوروانی کە نمونەی ئەوە کورتەک، زارگەلێ، باڵەیان و ناوچەیل ترەکە لە باشوور کوردستان.

Leave A Reply

Your email address will not be published.