جەمیل بایک: تورکیە دانریاسە سەر میز قومار

14

هاوسەرۆک شەورای ڕابەری کونفدرالیسم کومەڵگایەیل کوردستان کەجەکە جەمیل بایک، لە گفتگویگ وەگەرد ئاژانس خەوەری فورات، باوەڕ خوەی وە هێز و ئرادەی کوردەیل ئەڕا شکەست هێرش وەرفراوان ئیسەیی نیشان دایە.
جەمیل بایک لە باوەت چارە نویس عەفرین و بانان سوریەیش قسە و باس کردیە.

هاوسەرۆک کەجەکە جەمیل بایک رویداوەیل ئیسەیی روژهەڵات ناوەراسە وە شەڕ جەهانی سێم ناو بردیە و ئشارە کردیەسە هوشیاری لە چوار بەش کوردستان وەتیە، کوردەیل ئەڕا زنەییگ ئازاد تێکوشان کەن و ئیە توانێ وە فکر و فەلسەفەی ئۆجەلان ” گەل دموکراتیک” لە چوارچوی مەرزەیل سیاسی ئیسەی وڵاتەیل ناوچەگە ئەنجام بگرێ.

جەمیل بایک ئشارە کردیەسە ئامانج کوردەیل لە وەرانوەر ئستراتژی فاشیستی حاکم لە تورکیە و تاکید کردیە، کە حکومەت تورکیە نە تەنیا وەگەرد کوردەیل بەلکو وەگەرد دموکراتیک بین ناوچەگە دوشمنە.

جەمیل بایک لە قسەگانی هەمیش وەتیە: هاوەخت وەگەرد ئاڵوگورەیل بەرابەری ناوچەیی، تورکیە وە ئستفادە لە جیاوازیەیل ئیسەیی و پەیاکردن پشتیوان ئەڕا سەرکوت سیاسی و نزامی گەل کوردە، پلان لە ناو بردن کوردەیل وە ئاشکار کیشاسە دەیشت مەرزەیل و داگیرکردن عەفرین بەشی لە ئەوسە.

بایک هاسەر ئەو باوەرە حزب عەداڵەت و توسعە، تورکیە ناسە سەر میز قومار و ئشارە کردیەسە نەخش هێزەیل ناونەتەوەیی وەتیە: هەمان نەخش کە ئاڵمانیەیل لە نەسل کوشی ئەرمەنیەگان بازی کردن ئیسە روسیە لە وەرانوەر کوردەیل بازی کەید.

هاوسەرۆک کەجەکە وە تاکید لە ئرادەی کوردەیل ئەڕا پویچەل کردن پلانەیل تورکیە وەگەرد پشتیوانی روسیە، لە سیاسەت ئامریکا کە لە ئەوەلە و وە ئامانج قوروانی کردن کوردەیل روژهەڵات چەم فورات بیە و کە وە شیوەی ئاشکار لە مەسەلەی عەفرین دیارە رخنە گردیە.

جەمیل بایک لە باوەت دەخالەتەیل وڵاتەیل لە سوریە وەتیە: بەین ئامریکا، روسیە، تورکیە، فەرانسە و ئێران لە ناو خاک سوریە نیشاندەر ئەوەسە شەڕ داخلی سوریە هاناو مەرحەلەی ترەک.

هاوسەرۆک دەستەی وەڕێوبەری کونفدرالیسم کومەڵگایەیل کوردستان کەجەکە جەمیل بایک سیاسەت کوردەیل وە پاوەگەزدان لە وەرانوەر کردەوەیل داگیرکەرانە ناو بردیە و ئشارە کردیەسە پاوەگەزدان قارەمانانە لە عەفرین وجوریکە لە موحاسرەی کامل بی و نەوین پشتیوانی ناونەتەوەیی وەتیە: شەڕ تا وەخت رزگار کردن عەفرین تەمام ناود و هویچ لایەنیگ ناتوانێ وە لەوەر چەو نەگردن کوردەیل، حاکمیەت تازەیگ لە سوریە دامەزرنێ.

Leave A Reply

Your email address will not be published.