محەمەد عەبدوڵا جوور سەروک جمشت ئازادی کۆمەڵگای کوردستان هەڵوژیا

62

دویەکە یەکمین کۆنگرەی جمشت ئازادی کۆمەڵگای کوردستان لە شار سلێمانی باشوور کوردستان وە بەشداری ٧٠٠ ئەندام ئەو پارتە و دەسکەم ٣٠٠ مێوان وەڕێوە چی.

جمشت ئازادی کە تا ئێسە لە چوارچوەی سیستم هاوسەرۆکایەتی کار و خەبات کردنە، وەپای قانون عەراق سیستم خوەیان ئەوەز کردنە سیستم سەرۆکایەتی و سەرۆک پارتەکەیان هەڵوژانن.

دویەکە لە شار سلیمانی باشوور کوردستان یەکیمن کونگرەی دامەزرانن جمشت ئازادی کومەلگای کوردستان وەڕێوە چی، ئەو کۆنگرە لە شون ئەوە وەێوە چی کە کومیسیون بەرز هەلوژاننەگان عەراق ئجازەی کار و چالاکی ڕەسمی دریا جمشت ئازادی.

سیستم جمشت ئازادی هاوسەروکایەتیە، بەلام وە پای قانون دەوڵەت عەراق ناچارن سەرۆک هەڵوژنن و محەمەد عەبدوڵا وە فرەتەرین دەنگ جوور سەرۆک ئەو جمشتە هەڵوژیا و ١٧ ئەندام جوور دەستەی وەڕێوبەری هەڵوژیا، کە لەو ١٧ ئەندامە ١٠ کەسیان ژن و هەفت کەسیان پیاگن.

لەو بارەوە لە ئەندامەیل ئامادەکار کۆنگرەکە، شیلان شاکر وەتێە، ئەوان لە عەمەل لە چوارچوەی سیستم هاوسەروکایەتی کار کەن و تەقەلا کەن ئەو سیستمە لە عەراق جی بخەن.

سەروک تازەی جمشت ئازادی” محەمەد عەبدولا” بەیانیەی کوتایی کونگرەگە خوەند سەرکەفتن ئەو کونگرە لە بنەمالەی شەهیدەیل و ئەندامەیل پارتەکەیان بمارک وەت.

محەمەد عەبدولا هەمیش وەت: لە خەبات و تێکوشان بانان بایەد ئەو نابەرابریە لە وەرانوەر جنسیەت گرایی کوتایی وە پی باریم، کە سیستم هاوسەروکی پەسەن ناکەید.

سەروک جمشت ئازادی لە قسەگانی هەمیش وەت: رەوش ئیسەی باشوور کوردستان وە خاتر گەندەلی دەسلاتدارەیلە، کە تەنیا کورد لە ناوی حاکم نیە، بەلام داگیرکەرەیل کوردستان وە گشت شیوەیگ وەڕیوەی بەن، وەزیفەی جمشت ئازادی کومەلگای کوردستانە کە تێکوشان ئەڕا چارەسەر کردن رەوش ئالوز هەریم کوردستان بکەی.

محەمەد عەبدولا باس لە ئەویش کرد وەت: حکومەت ناوەندی عەراق و هەریم کوردستان وە ئەو ئەقلیەتە کە دیرنەی موشکلەگان دروس کردنە، ئیمە هایمە سەر ئەو باوەرە ئەقەلیت دموکراتیک توانید موشکلەگان چارە سەر بکەید.

ناوبریاگ هەمیش وەت: چارە سەر نەکردن موشکل و سیاستەگان ئەو رەوشە وە لێ کەفیدە و کە لە شوون ١٦ ئوکتوبر هاتە ئارا.

محەمەد عەبدولا لە ئاخر قسەگانی وەتیە: ئومید خوازیم ئەڕا ئەو کەسەیلە کە ئەڕا ئازادی گەلەگەمان هانە زندان ئازاد بکریەن، قەول دەیم خەبات ئەڕا دروسکردن کوردستانیگ ئازاد و دومکراتیک بکەیم.

جی وەتنە: جمشت ئازادی لە ١٧،١٠،٢٠١٧ دامەزریاس، بەلام لە روژ ٤،١٢،٢٠١٧ لە لایەن کومیسیون بەرز هەلواژدنەگان عەراق ئجازەی رەسمی کار و چالاکی وە پی دریا.

Leave A Reply

Your email address will not be published.