تلویزیون آرین

رژیم ئێران دەس کردیەسە دەسگیری هەرەمەکی خەڵک ناڕازی

11

وە پای راپورت شەبەکەی ماف بەشەر کوردستان، رژیم ئێران ژمار فرەیگ لە هێزەیل خوەی ئەڕا پاڕێزین لە ناوەندەیل دەولەتی لە شارەیل کرماشان، مەریوان، مهاباد، ئورمیە، کامیاران و سنە جێگر کردیە.

هێزەیل ئەمنیەتی کانال تلگرامیگ وە ناو” تحت تعقیب” دروس کردنە و کەسەیلیگ کە لە سەرهەڵدانەگان بەشداری کردنە شناسایی کەید و شەوانە ‌هێرش کەنە سەر مالیان و دەسگیریان کەن.

شەبەکەی ماف بەشەر کوردستان هەمیش وەتیە: فرەتر لە کەسەیلیگ کە دەسگیر کریانە خەڵک شار کرماشان و ئورمیەن.

هاوەخت خەسرەو کورد پوور مودیر ئاژانس خەوەری موکریان، لە چریان و بازجویی خوەی لەلایەن ئدارەی ئتلاعات مهاباد لە روژ ١٧ ئەی مانگە خەوەر داس، ئەی روژنامەوانە ماوەی وەرین وە خاتر بلاو کردن خەوەر لە باوەت سەرهەلدانەگان لە لایەن هێزەیل ئەمنیەتی شار مهاباد هوشدار دریاویە پێ.

وە پای راپۆرت شەبەکەی ماف بەشەر کوردستان دویەکە سێشەممە ١٩ بەفرانبار یەک چالاک مەدەنی وە ناو ئدریس شەریفی ئەندام ئەنجمەن علمی فەرهەنگی رونان، لە شون کار خوەی دەسگیر و ئەڕا شونێگ نادیار ئنتقاڵ دریاس.

ئدریس شەریفی پیشتر لە ساڵ ١٣٨٩ جارێ ترەک لە لایەن هێزەیل ئەمنیەتی دەسگیر کریاوی.

هەروەیجورە روژ ١٣ ئەی مانگە یەک کەس خەڵک شارسان جوانرو وە ناو ئاکۆ یاری لە لایەن هێزەیل ئەمنیەتی دەسگیر و ئەڕا بازداشگای ئتڵاعات ئی شارە ئنتقال دریا.

لە لای ترەک لە شون گۆزەریان یەک هەفتە لە دەسگیری یەک کەس کورد خەڵک شار نەوسود سەر وە ئوستان کرماشان وە ناو ماکوان حەسەنی تا ئیسە هێمان هویچ خەوەرێگ لە وەردەس نیە.

Leave A Reply

Your email address will not be published.