زەوی‌لەرزە باشور کوردستان لە ئەنجام زەوی‌لەرزەگەی دویەشەو ١٠٠ کەس هەناریانە نەخوەشخانە

104

دۆکتۆر بەختیار قادر پروفسور ژئو فیزیک لە قسەیلێک لە باوەت زەوی‌لەرزە وەتێە، ئیمە لە سەر لایەیگ لە زەوی زنەیی کەیم وە ناو لایە عەرەبی و لایە ئێرانیش دیریم کە ئی دو لایە هەمویشە وە یەک بەرخورد کەن.

زەوی لەرزەگەی مانگ وەرین لە ئەنجام کوو بین هێز فرە و بەرخوردەیل لایەیل زەوی روی دا و زەوی لەرزەگان ئدامە دیرێ تا ئەو هێزە تەمام بوود.

وە پای قسەی بەرپرس وەڕێوەبەرایەتی تەندروستی دەربەندیخان لە ئەنجام ئەو زەوی لەرزە لە شارسان دەربەندیخان ٥ کەس گیانیان لە دەس دان و ٢٠ کەسیش زامار بین، هەروەیجورە فرەتر لە ١٥٣٦ ماڵ هاووڵاتییەیل خەسار دیە کە ٤٤٣ لەوانە دی قابل ئستفادە نین ئەڕا زنەیی، هەروەیجورە خەسار فرەیگ رەسیە سەد ئاو دەربەندیخان و ژیرخان ئەو شارسانە.

هەروەیجورە لە ئەنجام ئەو زەوی لەرزە لە شارسان سەید سادق مناڵێگ ١٢ ساڵان گیانی لە دەس دا و دەیان کەسیش زامار بین، لە شارەک گۆڵالە سەر وە گەرمیانیش یەک پیاگ و مناڵێک گیانیان لە دەس داوین و ژمار فرەیگ لە هاووڵاتییەیل زامار بوین.

سەربار قەوڵ و قەرار بەرپرسەیل باشوور کوردستان ئێسە و لە شون یەک مانگ لەو قەولە، هێمان هویچ کارێگ ئەنجام نەگردیە.

چەندین جار خەڵک زەوی لەرزە لێداگ گردبیەنوەی ناڕەزایی ئەنجام دان و روژ ٧ ئی مانگیشە لە ساختمان ناونەد جوانەیل دەربەندیخان، ژماریگ لە چین و تویژەگان دەربەدیخان وەگەرد سەروک و ژمارێگ لە ئەندامەیل ئەنجۆمەن ئوستانداری سلێمانی کوبین و لە شون کوبینەوەگە ئازاد حەمە ئەمین لە باوەت کەمتەر خەمیەگان حکومەت هەرێم کوردستان نگرانی نشان دا.

هەروەیخاترە، کەمپێگ ئەڕا کووکردن هاوکاری و یارمەتی رەسانن وە خەڵک زەوی لەرزە لێداگ رێکخریا. هاووڵاتیەیل دەربەندیخان لە شون یەک مانگ لە رمیان ماڵەگانیان و چەن جار زەوی لەرزە، ترس کەفتیەسە دڵیان و لە ماڵ ناتوانن دانیشن و لە ژیر سەرمای زمسان لە ناو چادر زنەیی کەن

دویەشەویش چەندین زەویلەرزە لە روژهەڵات و باشوور کوردستان وە ئەنجام رەسی، وە پای ئامار لە ناو یەک مانگ فرەتر لە ٥٠٠ زەوی لەرزە باشوور کوردستان لەرزانیەسەو.

لە ئەنجام زەویلەرزەگان دویەشەو لە شار هەڵەبجە و شارسانەیل دەربەندیخان و سەید سادق فرەتر لە ١٠٠ کەس هەناریانە نەخوەشخانە.

Leave A Reply

Your email address will not be published.