هاوسەرۆک کەجەکە: تورکیە و سی‌پی‌تی بەرپرس شکەنجەی ئۆجەلانن لە زندان ئیمرالی

75

هاوسەرۆک کەجەکە، جەمیل بایک لە باوەت بەردەوامی نگرانیەکان لە باوەت رەوش ئۆجەلان و گردبینەوەی ناڕەزایی وەردەوم شەورای ئروپا و سازمان نواگیری لە شکەنجە لە شار ستراسبورگ فەرانسە وەتێە، گەل کورد و دوسەیل ئەوان لە گردبینەوەکەیان لە شار ستراسبورگ فەرانسە توان وە سازمان نواگیری لە شکەنجەی ئروپا بویشن کە ئەو لە وەرانوەر رەوش رابەر ئاپۆ بەرپرسە.

وەختێک رابەر ئاپۆ ئەڕا زندان ئیمرالی لە تورکیە ئنتقاڵ دان، سی‌پی‌تی تاکید کرد کە ئەو لە باوەت رەوش ئەو لە زندان چەودێری کەی.. ئەوان توانن نواگیری لە شکەنجەی رابەر ئاپۆ بگرن، بەلام ئەوان ناتوان ئەی کار ئەنجام بیەن، چوینکە ئەوان خوەیان لەی پلانگەڕیە دەس دێرن. بێ دەنگی یەکیەتی ئرۆپا لە باوەت چوینەتی بەرخورد وەگەرد رابەر ئاپۆ، هاوکاری وەگەرد تورکیەس.

هاوسەرۆک کەجەکە لە ئدامە روشنای خستە سەر ساڵگەرد ئێلان خوەیوەڕێوەبەری دموکراتیک لە شار و ناوچەیل باکوور کوردستان و ڕێز لە یاد و خاترەی کەسەیلێک گرد کە ئەڕا جێ خستن خوەیوەڕێوەبەری دموکراتیک لە وەرانوەر هێرش هێزەیل رژیم تورک پاوەگەزدان کردن و وە فدا کردن گیان خوەیان داستانەیل قارەمانە خوڵقانن.

جەمیل بایک ئشارە کردێە، لە ئەنجام هێرشەیل وەحشیانە فرە کەس گیانیان لە دەس دان، زامار بین وە یا وە ئەسیر کریان، ئەگەر ئەوان لە شار و ناوچەکان پاوەگەزدان نەکردان، حکۆمەت تورکیە خواستەیل خوەی وە سەر گەل کورد داسپان و کوشتارەیل ترەک جەمی لە کوردستان ئەنجام دا. پاوەگەزدان محەمەد تونچ و شەهیدەیل پاوەگەزدان شارەکان بی کە نیشان دا کە گەل کورد هویچ وەخت تەسلیم ناود.

 

جەمیل باییک لە باوەت ئالوگوڕیەیل باکوور سوریە، وەڕێوە چین هەلوژاردن شەورایەیل ئەڕا هێزەیل سوسیالیست، دموکراتیک و ئازادی خواز وە ئەرزش زانستیە و وە هوێر هاورد وەڕێوە بردن هەلوژاردن دموکراتیک لە وەخت شەڕ سوریە فرە وە ئەرزش بویە.

لەی باوەتە باییک هەمیش وەت: لە باکوور سوریە ساختاریگ تازەی سیاسی و کومەلگایی دامەزریاس، خەڵکەیل ناوچەگە ئەڕا وە دەس هاوردن دموکراسی، ئازادی، عەدالەت و بەرابەری وەگەرد یەک پاوەگەزدان کردن، لایەنەیل ناودەولەتی باس لە پروسەی سیاسی لە شون شەڕ داخلی سوریە کردنە بەلام هەرمای دیار نیە چەنیگ راس بود، ئەگەر فدراسیون دموکراتیک باکوور سوریە لە وەر چەو نەگرن هویچ موشکلیگ لە سوریە چارەسەر ناود.

Leave A Reply

Your email address will not be published.